/

Мамлакатмиз раҳбари Шавкат Мирзиёев Бухорога ташрифи чоғида шаҳарнинг яна бир дарвозаси — замонавий темир йўл вокзалида бўлди. Бу ерда иқтисодий-ижтимоий аҳамиятга эга кенг кўламли ва реал таклифларга асосланган мулоқотлар чоғида амалга оширилган ишлар кўлами намоён бўлди.
Мамлакатимиз раҳбари Ўзбекистон Темир йўллари магистралида амалга оширилаётган истиқболли лойиҳалар билан яқиндан танишди. Ана шундай лойиҳалардан бири, замонавий йўл-транспорт коммуникация тармоғининг муҳим бир қисми 350 километрдан иборат Бухоро—Мискин темир йўл қурилиши ҳисобланади. Айни пайтда ана шу лойиҳада кўрсатилган темир йўлнинг 334 километрида қурилиш ишлари олиб борилмоқда. 20 километрида эса реконструкция ишлари бажарилмоқда. 283 миллион доллар қийматидаги мазкур йирик лойиҳани йил охиригача якунига етказиш кўзда тутилган. Келажакда эса бу йўлларда электрлаштирилган юқори тезликдаги поездлар ҳаракати ташкил қилинади. 2018-2020 йилларда 334 километрлик Мискин билан Бухоро оралиғи, шунингдек, Мискин, Урганч ва Хивани боғловчи 120 километр масофадаги пўлат излар ҳам электрлаштирилади. Булардан ташқари, қўшимча равишда 28,8 километрлик Урганч ва Хивани боғловчи янги темир йўлнинг қурилиши лойиҳа ғоясини мантиқан давом эттиради. Ана шунинг ўзи эса йўловчилар учун яратиладиган имкониятларнинг кўламини кўрсатади. 2020 йилга қадар Мискиндан Нукусгача бўлган 240 километр мавжуд йўл электрлаштирилиши режага киритилган. Бу орқали мазкур йўналишдаги йўллар узунлиги 720 километрга етказилади. Мулоқот жараёнида Президентимиз мазкур йўналишдаги ишлар сифатини янада оширишга қаратилган қатор таклиф ва тавсияларни берди.
Юқори даражадаги инфратузилма туфайли Бухоро шаҳри вокзалида бир вақтнинг ўзида 500 нафар кишига хизмат кўрсатилиб, бир кеча-кундузда 2000 йўловчини кутиб олиш ва кузатиш имконияти мавжуд. Мамлакатимизда туризмни ривожлантиришга алоҳида аҳамият берилаётганини назарда тутсак, тарихий-маданий ёдгорликлари билан дунёни мафтун этиб келаётган Бухорода бундай истиқболли лойиҳалар амалга оширилишининг беқиёс аҳамиятини теран англаймиз.
Ислоҳотлар бориши эса тезюрар поездлар шиддатига уйғун. 2016 йил августида, Мустақиллик байрами арафасида Тошкент—Бухоро йўналишида юқори тезликда ҳаракатланувчи "Afrosiyob" электр поездининг илк қатнови амалга оширилганди. Ташриф чоғида Президентимиз янги "Afrosiyob" поезди имкониятлари ва йўловчилар учун яратилган қулайликлар билан танишди.
2011 йилдан бошлаб юртимизда 2 та юқори тезликда ҳаракатланувчи "Afrosiyob" электропоезди йўловчиларга хизмат қилиб келаётган эди. Янги замонавий электропоезд олдингиларига қараганда кенг имкониятга эга. Хусусан, шу вақтга қадар ҳаракатланаётган юқори тезликдаги электропоездлар 215 йўловчи сиғимига эга бўлиб, 2 та VIP, 2 та бизнес ва тўртта "эконом" тоифали вагонлардан иборат эди. Янги поезд эса 287 йўловчи сиғимига эга. Унда "эконом" тоифали вагонлар сони 2 тага кўп. Бу бир вақтнинг ўзида қўшимча 72 йўловчини ўз манзилига етказиш имконини беради.
Давлатимиз раҳбари шаҳарнинг замонавий қиёфаси ҳақида сўз юритар экан, Бухоро вокзалидан марказга кириб келадиган йўлнинг икки томони яхлит меъморий уйғунликда бунёд этилиши кераклигини таъкидлаб ўтди. Шунингдек, Когондан Бухоро шаҳригача бўлган масофада замонавий турар жой бинолари барпо этиш юзасидан зарур топшириқларнинг берилиши бунёдкорлик ишларининг янада кенгайишига хизмат қилади.
Айтиш мумкинки, бугунги кунда Бухоро вилояти улкан бунёдкорлик ва янгиланишлар оғушида. Ҳар бир қилинган амалий ҳаракатлар ўзининг ижобий натижасини бермоқда. Бу бухороликлар учун келгусида қатор қулайликлар ва шароитлар яратишга хизмат қилади. Мамлакатимиз раҳбарининг вилоятимизга ташрифи ана шундай бунёдкорлик ишлари учун замин яратди.
Дилфуза ЭРГАШЕВА,
халқ депутатлари Когон шаҳар Кенгаши депутати