Судлар одамларни сарсон қилиш учун эмас, адолат учун хизмат қилиши керак

/
Уч йил давомида амалга ошираётган ислоҳотларимизнинг ўзагини айнан жамият ва давлат ҳаётида адолат тамойилини жорий этиш ташкил этмоқда. Аммо бу соҳада йиллар давомида эътибор қаратилмаган талайгина муаммолар йиғилиб қолганки, бу ҳолат аҳоли орасида кўп норозиликларга сабаб бўлмоқда. Зеро, халқимиз ҳамма нарсага чидаши мумкин, лекин адолатсизликка чидамайди. Буни ҳис қилган ҳолда партия аҳоли орасига кенг кириб бориши, уларни ўйлантираётган масалаларни биргаликда ҳал этиши лозим.
Шу мақсадда Ўзбекистон “Адолат” социал-демократик партияси ҳудудларда, бошланғич партия ташкилотларида, маҳаллаларда янги дастурлари лойиҳасини кенг муҳокамадан ўтказмоқда.
Муҳокамалар жараёнида билдирилган таклифлар партия экспертлари томонидан йиғиб олинмоқда ва умумлаштирилмоқда. Айни жараёнларда суд-ҳуқуқ соҳаси бўйича ҳам кўплаб таклифлар келиб тушмоқда.
Ҳозирги кунда ҳудудларда ва туман (шаҳар)ларда фуқаролик, жиноий, маъмурий, иқтисодий ишлар бўйича судлар фаолият юритмоқда. Фуқаролик ва иқтисодий ишлар бўйича 2 та ёки 3 та туманда битта туманлараро суд фаолият юритмоқда. Фуқаролар эса қай бирига мурожаат қилишини билмай ҳайрон.
Яна амалиётда шундай ҳолатлар ҳам мавжудки, ойлар давомида судда маълум бир иш кўрилади-да сўнгра бизга эмас, бошқа судга тааллуқли экан, деб қайтариб юборилади. Табиийки, буларнинг барчаси фуқароларимизнинг сарсонгарчиликларига сабаб бўлмоқда.
Шу боисдан бошланғич партия ташкилотларидан келган турли йўналишларга бўлинган судларни умумлаштириш таклифи экспертлар томонидан алоҳида қизиқиш билан ўрганиб чиқилди.
Бунда фуқаролик, жиноий, маъмурий, иқтисодий ишлар бўйича Қорақалпоғистон Республикаси, вилоятлар ва Тошкент шаҳар судларини бирлаштириш орқали битта маъмурий ҳудудда битта суд идораси ташкил этилади.
Шунингдек, жиноий ва маъмурий ишлар бўйича туман, шаҳар судларини бирлаштириш, туманлараро фуқаролик ва иқтисодий ишлар бўйича судларни тугатиб, аҳоли сони ва иш ҳажмидан келиб чиққан ҳолда, ушбу тоифа ишлар бўйича туман, шаҳар судларига судья штати ажратиш орқали туман (шаҳар)ларда ҳам битта суд идораси ташкил этилади.
Натижада туман, шаҳарларда тўртта суд ўрнига битта суд идораси ташкил этилади, учта суд раиси штати қисқартирилади. Судьялар тайинланган тоифаси бўйича жиноий, фуқаролик, маъмурий ва иқтисодий ишларни кўради.
Бундан ташқари, фуқаролик ва иқтисодий ишлар бўйича судларга даъво ариза топшириш ва ишларни кўриш жараёнида фуқароларни бошқа туманларга қатнаб ёки тоифа бўйича суд идораларини қидириб сарсон бўлиб юришига, йўл, меҳмонхона каби харажатлар учун моддий зарар кўришига барҳам берилади.
Юқоридагиларни инобатга олган ҳолда Ўзбекистон “Адолат” социал-демократик партияси экспертлари томонидан тайёрланаётган Сайловолди дастурига судларни бирлаштириш таклифи киритилмоқда.
Шуҳрат ПОЛВАНОВ,
Қонунчилик палатасидаги
Ўзбекистон “Адолат” СДП фракцияси аъзоси,
Экспертлар гуруҳи аъзоси

Бошка Маълумотлар

01 янв 1970
Асосий қонунимиз тарғиботига бағишланган тадбирлар вилоятнинг барча туман ва шаҳарларида давом этмоқда....
01 янв 1970
Давлатимиз раҳбарининг 2019 йил 9 январдаги фармони амалга оширилаётган ишларда янги босқични бошлаб берди....
01 янв 1970
Бугунги кунда одам савдоси жинояти дунё жамоатчилигини, ҳар бир давлатни ташвишлантириб келаётган муаммолардан бири саналади....
01 янв 1970
Юртимизда азалдан оила муқаддас қўрғон сифатида эъзозланган. Зеро, инсон қалбида аҳиллик, меҳр-оқибат туйғулари, илм-маърифатга ошно бўлиш кўникмас...