Депутатларнинг энг яқин ҳамкори — журналистлар

/
Депутатларнинг энг яқин ҳамкори —  журналистлар
 
Президентимиз Шавкат Мирзиёевнинг Олий Мажлисга қилган бу галги Мурожаатномаси ҳам туман Кенгаши депутати, ҳам аёл, она сифатида мени жуда тўлқинлантириб юборди.
 
Айниқса, давлатимиз раҳбари ўтган 3 йил мобайнида Ўзбекистонда сўз эркинлигини таъминлаш, оммавий ахборот воситаларини ҳар томонлама ривожлантириш, журналист ва блогерларнинг эркин фаолият юритиши ва ижод қилиши учун ҳуқуқий асослар ва кенг имкониятлар яратилганини айтиб ўтди.
 
Юртбошимиз “Бундан кейин ҳам “Тўртинчи ҳокимият” вакилларининг эркин ва холис фаолият юритишлари, республикамизда амалга оширилаётган жадал ислоҳотларни халқимиз ва халқаро ҳамжамият учун очиқ-ойдин ёритишлари учун барча шарт-шароитларни яратамиз. Жойлардаги муаммо ва камчиликларни рўй-рост очиб бериш, уларни ҳаққоний ёритишларида мен профессионал журналистларни ҳамиша ва ҳар томонлама қўллаб-қувватлашга тайёрман”, дея журналистлар фаолиятини алоҳида эътироф этди. Чунки оммавий ахборот воситалари, журналистлар кундалик ҳаётимиз кўзгуси эканлиги ҳеч биримизга сир эмас.
 
Аслида давлатимиз раҳбари Олий Мажлис Қонунчилик палатасининг 2020 йил 20 январь куни бўлиб ўтган сайловдан кейинги биринчи мажлисида ҳам “Кўп одамларга журналистлар ёқмайди, лекин улар менга ёқади”,деб журналистларга юксак ҳурмат-эҳтиром кўр­сатган эди.
 
Албатта, мен бежиз бу масалага тўхталаётганим йўқ. Ахир ўзингиз ўйланг: бугун республика, вилоят, туман ва шаҳар миқёсидаги раҳбарларнинг қадами етмаётган жойларга бориб, масаланинг моҳиятини кенг ёритиб бераётган, муаммоларнинг ечими юзасидан ўз фикр-мулоҳазаларини, таклифларини ўртага ташлаётган ОАВ вакиллари эмасми? Ёки матбуот, телевидение, радио ва бугунги куннинг энг фаол қатлами бўлган блогерлар қайсидир муаммони ёритиб, жамоатчилик ва мутасаддилар эътиборига ҳавола этгач, ўша масала тез орада ечимини топган ва топаётган ҳолатлар озми? Ёхуд ноҳақликка учраган қайсидир юртдошимизнинг жонига оро кираётган, оғир дамларда уларнинг дардига дармон бўлаётган журналистларку.
 
Бундан ташқари, журналистлар биз, депутатларнинг энг яқин ҳамкоримиздир. Чунки сайловчилар билан бўладиган учрашув ва мулоқотларимиз, айни тадбирларнинг самараси айнан оммавий ахборот воситаларида ўз аксини топади. Ҳамкасбларимизни, жамоатчиликни баҳс-мунозарага чорлайди.
 
Мурожаатномада Юртбошимиз “ҳалоллик вакцинаси” деган янги атамани қўллади. Яъни жамият тараққиётининг кушандаси саналган коррурциянинг пайини қир­қиш учун “ҳалоллик вакцинаси” билан эмланиш энг мақбул ечим сифатида баҳоланди. Шундай экан, Юртдошларимизнинг коррупцияга қарши иммунитетини шакллантиришда ҳам оммавий ахборот воситалари вакиллари фаоллик кўрсатиши зарур. Негаки, оммавий ахборот воситаларида ёритилган коррупцияга оид ҳолатлар жамоатчиликка сабоқ бўлади. Айрим босар-тусарини билмай қолган шахсларнинг ўзига тегишли хулоса чиқариб олиши учун огоҳлантириш бўлиб ҳам хизмат қилади. Шундай экан, жойлардаги мутасаддилар ўз ҳудудига тааллуқли танқидий-таҳлилий мақолалар, репортажлар ва хабарларни тўғри қабул қилиб, иш ташкил этишса, мақсадга мувофиқ бўларди.
 
Ҳилола РЎЗИМУРОДОВА,
халқ депутатлари Хатирчи тумани
Кенгаши депутати

Бошка Маълумотлар

01 янв 1970
Бугун дунёда кечаётган глобаллашув жараёни инсоният тараққиётига ижобий таъсир кўрсатиш билан бирга, ўзида турли таҳдид ва хавф-хатарларни ҳам намо...
01 янв 1970
Ўзбекистон “Адолат” социал-демократик партияси Фарғона вилояти кенгаши “Ёш адолатчилар” қанотининг бир гуруҳ фаоллари Олий ...
01 янв 1970
Илмий кузатиш ва тадқиқотлар натижасида инсон ўз ҳаёти давомида оладиган барча маълумотнинг етмиш фоизини беш ёшгача бўлган даврда олиб улгуриши ан...
01 янв 1970
Умумхалқ муҳокамалари асосида қабул қилинган ушбу дастуриламал ҳужжат шу кунларда кенг жамоатчилик томонидан катта қизиқиш билан ўрганилмоқда....