Самарқанд давлат чет тиллар институтида АҚШнинг мамлакатмиздаги фавқулодда ва мухтор элчиси Дэниел Розенблюм ҳамда институт жамоаси ўртасида учрашув бўлиб ўтди.

 Учрашувда институтда инглиз тилини ўқитишни янада такомиллаштириш мақсадида АҚШнинг малакали мутахассисларни жалб этиш, ўз навбатида элчихона кўмагида институт профессор-ўқитувчиларининг хорижда малака оширишини ташкил этиш муҳокама қилинди. 

 Бундан ташқари, учрашувда хорижлик мутахассислар билан ҳамкорликда янги ўқув дарсликларини яратиш, биргаликда конференция ва маданий-маърифий тадбирлар ташкил қилиш ҳамда турли грант лойиҳаларида ҳамкорликда қатнашиш бўйича ҳам ўзаро келишиб олинди.

 Элчи жаноблари институтда АҚШ элчихонаси кўмагида ташкил этилган STEM (science, technical, engineering, mathematics) лойиҳаси аъзолари билан ҳам суҳбатлашди ва уларнинг тақдимотларини кузатди.

 STEM лойиҳасида институтда вилоятдаги ОТМларнинг математика, физика, биология, кимё, қишлоқ хўжалиги, ахборот технологиялари, муҳандислик каби таълим йўналишларидаги талабалар учун бепул инглиз тили курслари ташкил этилган бўлиб, машғулотлар Америкадан келган малакали ўқитувчилар томонидан олиб борилади.