ШАФФОФЛИК — АДОЛАТ ЙЎЛИ

/
Ёшлар масаласи давлатимиз сиёсатининг устувор йўналишларидан бири саналади. Ёшларнинг илм олиши, касб-ҳунар эгаллаши учун яратиб берилаётган шарт-шароитлар ўзининг кўлами ва сифати билан алоҳида аҳамиятга эга. Айниқса, олий таълим муассасаларига иқтидорли, билимли йигит ва қизларни ўқишга қабул қилиш масаласи йиллар давомида халқимизни ўйлантириб келаётган долзарб муаммолардан бири саналади.
Атрофимиздаги айрим нопок, товламачи, фирибгар кимсаларнинг ноўрин хатти-ҳаракатлари туфайли халқимизда тест синовларига нисбатан ишонч йўқолди. Телефон, шпаргалка, чип каби воситаларга ружу қўйилди. Энг ёмони, салбий йўллар билан ўқишга олиб кириб қўйишнинг хуфиявий механизми шаклланди.
Президентимиз фаолиятининг дастлабки кунларидан бошлабоқ бу иллатларга қарши муросасиз кураш бошланди. “Коррупция тўғрисида”ги қонуннинг қабул қилиниши, пора берган ҳам, пора олган ҳам қонун олдида бирдек жавобгар саналиши ҳақидаги бандлар юқоридаги каби ноқонуний йўлларни ахтараётган кимсаларнинг ҳаракатларига бирмунча чек қўйди.
Тажрибадан маълумки, салбий ҳолатларнинг сезиларли қисми ижодий имтиҳонлар билан боғлиқ ҳолда юзага келади. Ижодий ишларга нохолис ёндашиш, уларни баҳолашда таниш-билишчилик, гуруҳбозлик, маҳаллийчиликка йўл қўйиш олий таълим муассасаларидаги ижтимоий муҳитнинг бузилишига, жиноятчиликнинг келиб чиқишига сабабчи бўлаётган эди. Бу йилги тест синовларига алоҳида тайёргарлик ишларининг ташкиллаштирилиши, ижодий имтиҳонларда адолат, ҳалоллик ва шаффофликнинг таъминланиши ота-оналар ва абитуриентларнинг ҳақли эътирофларига сабаб бўлмоқда.
Таассуфки, шунча янгиланишларга, таълим соҳасидаги ислоҳотларга қарамасдан олий таълим муассасаларининг девори тагида ғимирлаб юрган, лақма кимсаларни ўз тўрига илинтириш пайида бўлган фирибгарлар ҳамон орамизда топилиб турибди.
Ҳурматли ота-оналар ва абитуриентлар, кўзингизни очинг. Имтиҳонлар жараёни тегишли давлат органлари назоратида турибди.
Имтиҳон жараёнлари барчага очиқ-ойдин кўрсатилиб, имтиҳон олувчилару абитуриентларнинг хатти-ҳаракатлари ташқаридан кузатиб турилади, синовларда шаффофлик, адолат таъминланади. Шаффофлик ва адолат эса энг мақбул йўлдир.
Валижон САЪДИЕВ,
Алишер Навоий номидаги Тошкент давлат ўзбек тили ва адабиёти университети бўлим бошлиғи

Бошка Маълумотлар

01 янв 1970
Ўзбекистонда мустақилликнинг илк йиллариданоқ оналар ва болаларга тиббий ёрдам кўрсатиш сифатини ошириш масаласига давлат сиёсати даражасида эътибо...
01 янв 1970
Қарши шаҳрида етим ва ота-она қарамоғидан маҳрум бўлган болалар учун мўлжалланган турар-жой биноси фойдаланишга топширилди....
01 янв 1970
Маълумки, янги ўқув йилидан бошлаб мамлакатимизда 11 йиллик умумий ўрта таълим жорий этилди ва бу борада кенг кўламли ишлар қилинмоқда. ...
01 янв 1970
Вобкентдаги “Чашмаи Айюб” мақбараси пештоқидан бундан 8 йил (!) аввал ўғирлаб кетилган ноёб кошин ўз жойига қайтарилади...