Айтганидан қайтаётган партиядан НИМА КУТИШ МУМКИН?

/
Жорий йил 20 сентябрь куни Марказий сайлов комиссияси томонидан Олий Мажлис Қонунчилик палатаси ҳамда халқ депутатлари маҳаллий Кенгашларига сайловлар 22 декабрь куни бўлиб ўтиши эълон қилинди. Мазкур тадбирда эътиборни тортган энг муҳим жиҳатлардан бири, бу йилги сайловлар очиқлик, ошкоралик руҳида бўлиб ўтиши ҳамда бунга эришиш учун барча имкониятлар яратилганлиги бўлди.
Очиғи, менга сайловнинг бу тарзда ўтиши жуда кўтаринки кайфият бағишлади. Бизларга болалигимиздан курашнинг ҳар қандай ҳолатида фақатгина мардлик тамойили асосида курашиш лозимлиги ўргатилган. Аммо бугун айрим рақиб партиялар билан баҳсга киришганимизда, хусусан, ғирром услублардан фойдаланишлари одамни ўйлашга мажбур қилмоқда.
Бугун сайловолди тарғиботи жараёнларида республикамиздаги бешта сиёсий партия 33 миллиондан ортиқ аҳолимизнинг келгуси беш йилдаги тақдири учун масъулликка даъвогарлик қилмоқда. Ачинарлиси, улар ичида ҳали ҳамон ўзининг бугунги йўлини белгилаб ололмаган сиёсий кучнинг ҳам борлигидир. Куни кеча “Миллий тикланиш” ДП расмий сайтида “Сиёсий майдон: ким аслида ким?” сарлавҳаси остида мақола эълон қилинди. Ҳар доимгидек зийрак фуқароларимиз томонидан бу мақола “ёлланма ёзувчи” ёзганлиги ва асоссиз маълумотлар келтирилганлиги танқид остига олингач, мақола партия сайтидан олиб ташланди. Ке¬йинги пайт¬ларда бундай шармандали ҳолатдаги маълумотларни жойлаш ва эътирозлардан кейин уларни ўчириб ташлаш “Миллий тикланиш” ДП учун одатий ҳолга айланиб бормоқда. Партия ўз сайтида марказий сайлов штабини очганлиги ҳақидаги мақолага жойлаштирилган, ўзбек халқига хос бўлмаган кийимдаги қизлар расмини ўчириш билан ҳам шундай ҳолатлардан бирига йўл қўйган эди.
Яна бир ажабланарли жиҳати, бундай шошма-шошарлик билан “қовун тушириш” партия раҳбари ва депутатларига ҳам хос ҳолат эканлигида намоён бўлмоқда. Бундан бир неча ой олдин партия депутати Кобул Дўстов партия лидери Алишер Қодировнинг ўзи билан бўлган ёзишмаларини ўчириб ташлаганини таъкидлаганди. Шунингдек, Олий Мажлис Қонунчилик палатасидаги ЎзМТДП фракцияси аъзоси Акмал Умрзоқов фейсбукдаги саҳифасида блогерлар ҳақида фикр билдириб, кейин ўз саҳифасидан ўчириб ташлагани ҳам яна бир мисол. Хуллас, бундай ҳолатлар яна бир бор сайловчиларга “Миллий тикланиш” ДПнинг ўз сўзи, шиори ва бугунги кунда халқимиз кутаётган муносиб сайловолди дастури йўқлигини кўрсатмоқда. (Яхшиямки, дастурчилар интернет оламида техник шароитлар яратиб, ўчириш имкониятини берган экан, бу бир қарорга келолмайдиган, фикрини тез ўзгартирувчи ташкилотлар учун айни муддао бўляпти).
Биринчидан, сиёсий майдонда сиё¬сий партияларнинг аслида қандай ўринга эга эканлигини билмасдан, кўнгил розилигини оладиган даражадаги маблағни рад этолмай мақола ёзиб бериш ҳолати ижтимоий тармоқларда салбий фикр уйғотмоқда. Тад-қиқотчи Фарзона Ҳамидуллаева мақоласи бошида партияларнинг иссиқ ўрни ҳақида фикр билдирган. Шу ўринда менда ва ижтимоий тармоқнинг бошқа фойдаланувчиларида бир савол туғилмоқда. Тад¬қиқотчи номига доғ тушириб, саёз таҳлилни бўрттириб ёритиб бериш учун таклиф қилинган қанча нарх тадқиқотчини ўз иссиқ ўрнидан қўзғатган экан? Тадқиқотчи мақоласида “Буни англаш учун бир сидра ижтимоий тармоққа назар ташлашнинг ўзи кифоя”, дея фикр билдирган. Бугун барча ижтимоий тармоқ фойдаланувчиларига маълумки, сўнгги вақтларда ижтимоий тармоқда “Миллий тикланиш” ДП ҳақида ижобий эмас, ўз номига ва халқимизга хос бўлмаган фаолияти танқидий фикрлар билан ифодаланмоқда.
Иккинчидан, Ф.Ҳамидуллаева бугунги кунда сиёсий жараёндаги пар¬тиялар фаолиятини кўр-кўрона тарзда “кир ювиш” машинасига ўхшатишини қандай изоҳлаш мумкин? Тадқиқотчи Россия медиа маконида таниқли телебошловчи Андрей Малаховнинг “Пусть говорят” кўрсатуви кир ювиш машинасига қиёсланганини таъкидлаб, мамлакатимиздаги “айрим партиялар эса “кир ювиш” билан овора бўлаётганларини кўриш мумкин”, деб ёзади.
Эҳтимол тадқиқотчининг ўзи “кир ювиш” билан овора бўлиб, бугун айнан “Адолат” СДП томонидан ёш олимлар ва тадқиқотчиларни қўллаб-қувватлаш, уларнинг ижтимоий ҳимоясини таъминлаш борасида амалга оширилаётган ишлар, давлат дастурига таклифлар киритиш орқали маълум бир натижаларга эришилаётганидан бехабар қолгандир.
Учинчидан, агар Фарзона Ҳамидуллаева чиндан тадқиқотчи деган номнинг қадрини билганида фақатгина қўлига тут-қазилган “Миллий тикланиш” ДП сайловолди дастурини эмас, қолган сиёсий партияларнинг ҳам сайлов¬олди дас¬тури билан танишган ва барча партиялар дастурининг ташқи фаолият йўналишида миллий манфаатлар энг устувор масала эканлигини, бугун “Миллий тикланиш” ДП халқимизнинг маълум бир қатлами манфаати билан чекланиб қолган пуч сайловолди дастурини тўлдириш учун қолган партияларнинг сайлов¬олди дастурида йиллар давомида кўтарилиб келиниб, маълум бир натижалар амалга оширилган соҳанинг қонунчилик базаси яратилган йўналишлардаги ғояларни ўз дастурига киритганлигини англаган бўлар эди.
Жумладан, бугун партия лидери Алишер Қодиров томонидан айтилаётган умумий ўрта таълим, мактабгача таълим тизими ҳақидаги гаплар “Адолат” СДП томонидан бир неча чақириқлардан бери кўтариб келинади. “Адолат” СДП бугун бу йўналишларда бир қатор амалий ишларни олиб бориб, тизимдаги муаммолар ечими юзасидан ҳам ўз таклифларини ишлаб чиққан. Бунга умумий ўрта таълим мактабларида ўқувчилар сони меъёрида бўлишини таъминлаш, ягона мактаб формасини жорий қилиш, мактаб ва мактабгача таълим муассасаларини тоза ичимлик суви билан таъминлаш, болажонларнинг саломатлигини доимий назорат қилиш учун таълим-тарбия масканларида тиббиёт хоналари ва тиббиёт ходимларининг фаолиятини тўлақонли йўлга қўйиш, МТМ тарбияланувчиларининг ўз вақтида ва белгиланган меъёрлар асосида овқатланишини назорат қилиш, бу тизимни мактабларда ҳам жорий этиш ташаббуси билан чиқиб, бу борада амалий ишлар қилиб келмоқда.
Муаллиф мақоласидаги яна бир кулгили ҳолат — бугун ижтимоий тармоқларда холис фикр билдираётган блогерларнинг “ўгай”, дея қораланиши. Бундай аламли ташланиш ҳолати “Миллий тикланиш” ДП вакиллари учун одатий ҳол. Нега энди “буюртма” эвазига қалам тебратаётган тадқиқотчи Фарзона Ҳамидуллаева блогер Bayonoff.uz каби ишлашни истамаган холис блогерларга бундай баҳо бермоқда?
Тўртинчидан, муаллиф “айрим блогерларнинг “Миллий тикланиш” байроғини кўтариб, суратга тушган қизларни чуқур ўйламасдан муҳокама қилаётганларини тушуниш қийин”лигини қайд этади. Ажабо, рўпарасидан чиққан, халқимизга хос бўлмаган кийимдаги қизларнинг қўлига байроқларини тутқазгани ва буни кўз-кўз қилиб ўз расмий сайти ва ижтимоий тармоқлардаги саҳифаларига жойлагани учун ўша тадбирга йиғилган партия раҳбарияти хижолат тортмасдан, шу юрт тақдирига бефарқ бўлмаган блогерлар уялиши лозимми? Яна бир кулгили жиҳати, бу блогерлар “Адолат” СДП буюртмасини бажараяпти, дея қилинган иддао. Менингча, “Миллий тикланиш” ДП ва унинг бир қатор ҳимоячилари ҳамон уйқуда. Сўнгги йилларда жамиятимиздаги очиқлик ҳамда шаффофликни таъминлашда ўзларининг холис ва ҳаққоний фаолиятлари орқали муносиб ҳисса қўшиб келаётган ОАВ ходимлари ва блогерлар фаолияти билан ҳамон яқиндан танишиб улгуришмаган кўринади.
Бешинчидан, Алишер Қодировнинг митинглардаги чиқишини “байроқ” қилгани ҳам тўлақонли мисоллар билан асослантирилмагани учун бир-икки мисолларни айтиб ўтишни жоиз топдик. Кўпчиликка маълум, Алишер Қодиров митингларда партия 20 йилдан бери кўтариб келаётган, аммо амалда ҳеч бир натижага эришилмаган ўзбек тилининг бузилиш ҳолатлари, болалар тарбияси ҳамда бошқа партияларнинг халқимиз орасида муносиб ишонч қозонган ғояларини таъкидламоқда. Аммо бугун халқимизга, Жалолиддин Румий таъбири билан айтганда, “маслаҳат берадиган эмас, ўрнак бўладиган” партия керак. “Миллий тикланиш” ДП эса бугун ҳудудларда тарғибот тадбирларини ўтказиб бўлгач, тадбирда фойдаланилган тарғибот материалларини аҳолининг табини хира қиладиган ҳолатда қолдириб кетиш билан “ўрнак” бўлаяптими? Жумладан, 13 сентябрь куни Тошкент шаҳрининг “Сайлгоҳ” кўчасида ўтказилган тадбирдан кейин қолдириб кетилган партия тар¬ғибот баннерлари. Барчамизга маълумки, Тошкент шаҳрига ташриф буюрувчи хорижлик меҳмонларнинг асосий манзилларидан бири — бу “Сайлгоҳ” кўчаси. Бундай ҳолат шаҳримиз меҳмонларида салбий таассурот уйғотишга олиб келмоқда. Бу эса туризмни ривожлантириш “Миллий тикланиш”¬нинг вазифаси демасдан, халқимиз фаровонлигини ўйлаб жон куйдираётган, юртимизга ташриф буюраётган сайёҳлар оқимини ошириш учун ҳаракат қилаётган партиялар ҳамда “Миллий тикланиш” учун “ўгай” бўлган блогерларнинг таъбини хира қилмоқда.
Хулоса қилиб айтганда, тадқиқотчиликка даъвоим бўлмаса ҳам сўнгги вақт¬даги кузатишларим ва таҳлилларим шуни кўрсатаяптики, “Миллий тикланиш”нинг анъанасини давом эттириб, мазкур партия жамиятда устувор ғоялар орқали курашаётган яна қайсидир бир партияга қўшилган тақдирда ҳам бу “Миллий тикланиш” ДП фаолияти учун ижобий натижа бермайди чоғи. Чунки партиянинг пойдеворида ўз вақтида учта мақсад ва ғояларни илгари сурган партия ғоялари умумлашган. Шунингдек, бугунги кунда “Миллий тикланиш” ДП бошқарув органидаги аксарият вакиллар йиллар давомида бошқа бир партия ғоялари остида фаолият олиб бориб, тажриба орт¬тирган ходимлардан иборат. Бу ҳолат ҳам ўзининг салбий таъсирини кўрсатмасдан қолмайди, албатта.
Фаррух АБДУҲАМИДОВ,
Ўзбекистон “Адолат” СДП Матбуот хизмати масъул ходими

Бошка Маълумотлар

01 янв 1970
Олий Мажлис Қонунчилик палатасидаги Ўзбекистон “Адолат” СДП фракциясининг навбатдаги йиғилиши бўлиб ўтди....
01 янв 1970
Жиноят ишлари бўйича Тошкент шаҳар судида Ўзбекистон “Адолат” СДПнинг янги Сайловолди дастури лойиҳасида суд-ҳуқуқ соҳасига доир вазифа...
01 янв 1970
Олий Мажлис Қонунчилик палатасидаги Ўзбекистон “Адолат” СДП фракциясининг навбатдаги йиғилиши бўлиб ўтди. ...
01 янв 1970
Фуқаролик жамияти шаклланишини мониторинг қилиш мустақил институти томонидан семинар-тренинглар ўтказилмоқда....