/

Она табиат уйғонди. Кун сайин яқинлашиб келаётган Наврўз айёми муносабати билан юртимизнинг барча ҳудудларида байрам сайиллари бошланди.
Жумладан, Тошкент вилояти Оҳангарон тумани “Янги ҳаёт” маҳалласининг яшилликка бурканган сўлим гўшасида Ўзбекистон электрон оммавий ахборот воситалари миллий ассоциацияси, Тошкент вилояти ҳокимлиги ва “Sevimli” телеканали ҳамкорлигида ташкил этилган тадбир ҳақиқий байрам шодиёнасига айланди. Байрам тадбирида карнай-сурнай садолари остида меҳмонларнинг кутиб олиниши, фольклор жамоаларининг чиқишлари, миллий ҳунармандлик намуналари намойиши, дилларни яшнатган Наврўз шукуҳи барчага кўтаринки кайфият улашди. Сумалак, ош, ҳалим, шунингдек, баҳор неъматларидан тайёрланган кўк чучвара, кўк сомса сингари тансиқ таомлар байрам дастурхонини безади.
Она юрт, баҳор ва Наврўз мадҳида янграган куй-қўшиқлар, халқ сайли тадбирлари, “Ёр-ёр” ва “Ўланлар” айтишувлари, дорбозларнинг чиқишлари иштирокчиларга завқ-шавқ бағишлади.